Arrhythmia
តើ Arrhythmia គឺជាអ្វី?
Arrhythmia គឺជាចង្វាក់បេះដូងដែលលោតមិនស្មើគ្នា។ មានន័យថាបេះដូងរបស់លោកអ្នកលោតចង្វាក់ខុសពីចង្វាក់ធម្មតារបស់វា។
លោកអ្នកអាចមានអារម្មណ៍ថា បេះដូងលោតរំលងចង្វាក់, លោតថែមចង្វាក់, ឬកំពុងរញ្ជួយ។ មួយទៀតក៏អាចមានអារម្មណ៍ថាវាកំពុងលោតលឿនពេក (ដែលគ្រូពេទ្យហៅថា Tachycardia) ឬយឺតពេក (ហៅថា Bradycardia) ។ ឬក៏លោកអ្នកប្រហែលជាមិនកត់សម្គាល់ឃើញអ្វីទាំងអស់។
Arrhythmias អាចជាភាពអាសន្នមួយ ឬពេលខ្លះ អត់មានគ្រោះថ្នាក់អ្វីទេ។ ប្រសិនបើលោកអ្នកមានអារម្មណ៍ថាចង្វាក់បេះដូងលោកអ្នកមានអ្វីមិនប្រក្រតី សូមរកជំនួយពីគ្រូពេទ្យភ្លាមៗ ធ្វើដូច្នេះគ្រូពេទ្យអាចរកមូលហេតុដែលវាកើតឡើង និងអ្វីដែលលោកអ្នកត្រូវធ្វើដើមី្បការពារ។
អាការជំងឺ Arrhythmias
Arrhythmias អាចស្ងៀមស្ងាត់ បានន័យថាលោកអ្នកមិនអាចកត់សម្គាល់ឃើញអាការអ្វីឡើយ។ ដោយឡែក គ្រូពេទ្យអាចនឹងរកឃើញចង្វាក់បេះដូងមិនស្មើគ្នា ក្នុងពេលពិនិត្យរាងកាយ។
អាការ Arrhythmias រួមមាន ៖
- ញ័រទ្រូង (អារម្មណ៍ដែលបេះដូងលោតផ្លោះចង្វាក់, រញ្ជួយ, ឬបេះដូងលោតផ្លាប់ៗ)
- លោតខ្លាំងនៅក្នុងទ្រូង
- វិលមុខ ឬមានអារម្មណ៍ងងឹតមុខ
- ដួលសន្លប់
- ដង្ហើមខ្លី
- ចុកទ្រូង ឬតឹង
- ខ្សោយ ឬអស់កម្លាំង (មានអារម្មណ៍នឿយហត់)
- ថប់អារម្មណ៍
- មើលឃើញព្រិលៗ
- បែកញើស
មូលហេតុកើត Arrhythmia
លោកអ្នកអាចមាន Arrhythmia ទោះបីបេះដូងលោកអ្នកមានសុខភាពល្អក៏ដោយ។ ឬក៏វាអាចកើតឡើងដោយសារតែ ៖
- ជំងឺបេះដូង
- ការខុសតុល្យភាពអេឡិចត្រូលីត (ដូចជាសូដ្យូម ឬប៉ូតាស្យូម) នៅក្នុងឈាម
- ការរងរបួសបេះដូង ឬការប្រែប្រួល ដូចជាការថយចុះលំហូរឈាម ឬជាលិកាបេះដូងឡើងរឹង
- ដំណើរការព្យាបាលបន្ទាប់ពីវះកាត់បេះដូង
- ថ្នាំមួយចំនួន
- បញ្ហាជាមួយនឹងសញ្ញាអគ្គិសនី (Electrical Signal) នៅក្នុងបេះដូង
- អារម្មណ៍ស្ត្រេស ឬភ្ញាក់ផ្អើលខ្លាំង
- អ្វីៗនៅក្នុងជីវិតប្រចាំថ្ងៃ ដូចជាគ្រឿងស្រវឹង, ថ្នាំជក់, ជាតិកាហ្វេអ៊ីន, ឬការហាត់ប្រាណ
កត្តាហានិភ័យរបស់ Arrhythmia
អ្វីដែលអាចធ្វើឱ្យលោកអ្នកអាចកើត Arrhythmia រួមមាន ៖
- អាយុ ៖ ឱកាសកើតជំងឺនេះនឹងកើនឡើងនៅពេលលោកអ្នកកាន់តែចាស់។
- ហ្សែន ៖ លោកអ្នកអាចមានឱកាសខ្ពស់ក្នុងការកើត Arrhythmia ប្រសិនបើសាច់ញាតិជិតស្និទ្ធរបស់លោកអ្នកមានជំងឺនេះ។ ប្រភេទជំងឺបេះដូងមួយចំនួនទៀតក៏អាចកើតនៅក្នុងគ្រួសារដែរ។
- របៀបរស់នៅ ៖ ការផឹកគ្រឿងស្រវឹង, ការប្រើថ្នាំជក់, និងការប្រើថ្នាំកម្សាន្ត អាចបង្កើនហានិភ័យកើតជំងឺនេះ។
- លក្ខខណ្ឌជំងឺ ៖ ជំងឺលើសឈាម, ជំងឺទឹកនោមផ្អែម, ជាតិស្ករក្នុងឈាមទាប, ការធាត់, បញ្ហាដង្ហើមក្នុងពេលគេង, និងជំងឺស្វ័យភាពស៊ាំ (Autoimmune Disorder) គឺស្ថិតក្នុងចំណោមលក្ខខណ្ឌដែលអាចបណ្តាលឱ្យមាន Arrhythmia។
- បរិស្ថាន ៖ អ្វីៗលើពិភពលោកដែលមាននៅជុំវិញខ្លួនលោកអ្នក ដូចជាការបំពុលបរិយាកាសជាដើម ក៏អាចធ្វើឱ្យមាន Arrhythmia ដែរ។
ប្រភេទ Arrhythmia
Arrhythmia ត្រូវបានបែងចែកទៅតាមទីតាំងដែលវាកើត។ ប្រសិនបើវាកើតនៅក្នុងថតបេះដូងខាងក្រោម (Ventricle) នោះគេហៅវាថា Ventricular។ បើវាកើតនៅថតបេះដូងខាងលើ (Atria) គេនឹងហៅវាថា Supraventricular។
គ្រូពេទ្យក៏អាចដាក់វាជាក្រុមតាមរបៀបដែលវាប៉ះពាល់ដល់ចង្វាក់បេះដូងរបស់លោកអ្នក។ Bradycardia គឺជាចង្វាក់បេះដូងតិចជាង ៦០ ក្នុងមួយនាទី។ រីឯ Tachycardia គឺចង្វាក់ច្រើនជាង ១០០ ក្នុងមួយនាទី។
Supraventricular Arrhythmia រួមមាន ៖
- Premature atrial contractions ៖ ទាំងនេះគឺជាចង្វាក់បន្ថែមដំបូង។ វាគ្មានគ្រោះថ្នាក់ទេ ហើយជាទូទៅមិនត្រូវការការព្យាបាលឡើយ។
- Atrial fibrillation (AFib) ៖ ថតបេះដូងខាងលើរបស់លោកអ្នកកន្ត្រាក់ខុសពីធម្មតា។ វាអាចលោតច្រើនជាង ៤០០ ដង ក្នុងមួយនាទី។
- Atrial flutter ៖ វាទៀងទាត់ជាង Atrial fibrillation ។ ជាញឹកញាប់ វាកើតឡើងចំពោះអ្នកដែលមានជំងឺបេះដូង និងនៅសប្តាហ៍ដំបូងបន្ទាប់ពីការវះកាត់បេះដូង។ វានេះតែងតែប្រែប្រួលទៅជា Atrial fibrillation ។
- Paroxysmal supraventricular tachycardia (PSVT) ៖ នេះគឺបេះដូងលោតលឿន និងជាប្រចាំ។ វាកើត រួចបញ្ចប់ភ្លាមៗ។
- Accessory pathway tachycardias ៖ បេះដូងលោកអ្នកអាចនឹងដើរលឿនដោយសារតែមានផ្លូវដើរបន្ថែមមួយទៀត រវាងថតបេះដូងខាងលើ និងថតបេះដូងខាងក្រោម។ ប្រៀបធៀបដោយគិតថាវាជាផ្លូវកាត់ទៅកាន់ផ្ទះរបស់លោកអ្នក ដូច្នេះផ្លូវកាត់តែងតែលឿនជាងហើយ។ នៅពេលរឿងនេះកើតឡើងនៅក្នុងបេះដូងរបស់លោកអ្នក វាអាចបណ្តាលឱ្យចង្វាក់បេះដូងលឿន។
- AV nodal reentrant tachycardia (AVNRT) ៖ នេះបណ្តាលមកពីផ្លូវកាត់មួយនោះ ឆ្លងកាត់ផ្នែកមួយនៃបេះដូងរបស់លោកអ្នក ដែលហៅថា AV node។ វាអាចបណ្តាលឱ្យញ័រទ្រូង, ដួលសន្លប់, ឬខ្សោយបេះដូង។
Ventricular Arrhythmia រួមមាន ៖
- Premature ventricular contractions (PVCs) ៖ វាស្ថិតនៅក្នុងចំណោម Arrhythmia ទូទៅ។ វាជាប្រភេទបេះដូងលោតរំលងចង្វាក់ ដែលពេលខ្លះ យើងអាចមានអារម្មណ៍ដឹង។
- Ventricular tachycardia (V-tach) ៖ នេះគឺជាចង្វាក់បេះដូងលោតលឿន ដែលចាប់ផ្តើមពីថតបេះដូងខាងក្រោម។ ដោយសារតែបេះដូងរបស់លោកអ្នកលោតលឿនពេក ដូច្នេះវាមិនអាចបំពេញឈាមគ្រប់គ្រាន់ទេ។ នេះអាចជា Arrhythmia ធ្ងន់ធ្ងរ ជាពិសេសចំពោះអ្នកដែលមានជំងឺបេះដូង ហើយវាអាចនឹងមានអាការជំងឺផ្សេងៗ។
- Ventricular fibrillation (V-fib) ៖ រឿងនេះកើតឡើងនៅពេលដែលថតបេះដូងខាងក្រោមញ័រ ហើយមិនអាចកន្ត្រាក់ ឬច្របាច់ឈាមទៅឱ្យផ្នែកផ្សេងទៀតនៃរាងកាយរបស់លោកអ្នកបាន។ វាជាករណីជំងឺបន្ទាន់ ដែលត្រូវតែព្យាបាលដោយ CPR និង defibrillation ឱ្យបានឆាប់តាមដែលធ្វើបាន។
- Long QT syndrome ៖ ថតបេះដូងខាងក្រោមរបស់លោកអ្នកចំណាយពេលយូរពេក ដើមី្បកន្ត្រាក់ និងព្រលែង។ នេះអាចបណ្តាលឱ្យមានបញ្ហាចង្វាក់បេះដូងដែលមានគ្រោះថ្នាក់ និងអាចស្លាប់។
មាន Arrhythmia មួយប្រភេទទៀត ហៅថា Bradyarrhythmia គឺជាចង្វាក់យឺតៗ ដោយសារមានជំងឺនៅក្នុងប្រព័ន្ធអគ្គិសនីបេះដូង ឬដោយសារការប្រើថ្នាំ។ វាអាចធ្វើឱ្យលោកអ្នកសន្លប់ ឬមានអារម្មណ៍ថាចង់សន្លប់។ ប្រភេទ Bradyarrhythmia រួមមាន ៖
- Sinus node dysfunction ៖ នេះបណ្តាលមកពីថ្នាំងស៊ីនុស (Sinus Node) របស់បេះដូង ដែលជាឧបករណ៍ល្បឿនពីធម្មជាតិ (Natural Pacemaker)។
- Heart block ៖ នេះជាការពន្យារ ឬបណ្តុំនៃចរន្តអគ្គិសនី នៅពេលវាធ្វើដំណើរពីថ្នាំងស៊ីនុសបេះដូងរបស់លោកអ្នកទៅកាន់ថតបេះដូងខាងក្រោម។
ការធ្វើរោគវិនិច្ឆ័យ Arrhythmia
ដើម្បីធ្វើរោគវិនិច្ឆ័យ ឬរកមូលហេតុរបស់ Arrhythmia គ្រូពេទ្យនឹងប្រើតេស្ត រួមមាន ៖
- EKG ៖ Electrocardiogram កត់ត្រានូវសកម្មភាពអគ្គិសនីបេះដូងរបស់លោកអ្នក។ លោកអ្នកត្រូវពាក់បន្ទះអេឡិចត្រូតតូចៗនៅលើទ្រូង, ដៃ, និងជើង ដើមី្បធ្វើតេស្តដែលរហ័ស និងគ្មានការឈឺចាប់ ដោយតេស្តនេះធ្វើនៅការិយាល័យរបស់គ្រូពេទ្យ។
- Holter Monitor ៖ នេះគឺជា EKG ចល័ត ដែលលោកអ្នកនឹងប្រើរយៈពេលពី ១ ទៅ ២ ថ្ងៃ។ លោកអ្នកដាក់អេឡិចត្រូតនឹងស្បែករបស់លោកអ្នក។ វាមិនមានការឈឺចាប់ទេ ហើយលោកអ្នកអាចធ្វើអ្វីគ្រប់យ៉ាងបាននៅពេលពាក់អេឡិចត្រូតនេះ លើកលែងតែងូតទឹក។
- Event Monitor ៖ ប្រសិនបើលោកអ្នកគ្មានអាការជំងឺញឹកញាប់ទេ គ្រូពេទ្យប្រហែលជាណែនាំឱ្យលោកអ្នកពាក់វា ដែលជាធម្មតា ត្រូវពាក់មួយខែ។ នៅពេលលោកអ្នកចុចប៊ូតុង វានឹងកត់ត្រា និងរក្សាទុកនូវសកម្មភាពអគ្គិសនីបេះដូងរបស់លោកអ្នក ប្រមាណពីរបីនាទី។ សូមលោកអ្នកព្យាយាមអាន នៅពេលលោកអ្នកសម្គាល់ឃើញមានអាការជំងឺ។ ហើយគ្រូពេទ្យនឹងបកស្រាយលទ្ធផលប្រាប់លោកអ្នក។
- Implantable loop recorder ៖ គ្រូពេទ្យដាក់វានៅក្រោមស្បែករបស់លោកអ្នក ដោយវានឹងកត់ត្រាសកម្មភាពអគ្គិសនីបេះដូងរបស់លោកអ្នកជាប់ជានិច្ច។ ហើយវាអាចផ្ញើព័ត៌មានទាំងអស់នោះទៅកាន់ការិយាល័យវេជ្ជបណ្ឌិតរបស់លោកអ្នកទៀតផង។
- Stress Test ៖ ស្ត្រេសតេស្តមានប្រភេទផ្សេងៗគ្នា។ គោលដៅរបស់ស្ត្រេសតេស្ត គឺពិនិត្យមើលថាតើបេះដូងអាចគ្រប់គ្រងបានកម្រិតណា មុនពេលកើតមានបញ្ហាចង្វាក់បេះដូង ឬមិនមានឈាមគ្រប់គ្រាន់។ ចំពោះស្ត្រេសតេស្តទូទៅនោះ គឺលោកអ្នកត្រូវដើរលើម៉ាស៊ីនហាត់ប្រាណ ឬធាក់កង់ដោយប្រើម៉ាស៊ីនធាក់កង់ហាត់ប្រាណ ខណៈដែលមាន EKG និងម៉ូនីទ័រត្រួតពិនិត្យចង្វាក់បេះដូង និងសម្ពាធឈាមរបស់លោកអ្នក។ អ្នកបច្ចេកទេសនឹងបង្កើនកម្រិតអាំងតង់ស៊ីតេការហាត់របស់លោកអ្នកបន្តិចម្តង ៗ ។
- Echocardiogram ៖ តេស្តនេះប្រើអុលត្រាសោនដើម្បីពិនិត្យសាច់ដុំបេះដូង និងសន្ទះបេះដូង។
- Cardiac catheterization ៖ គ្រូពេទ្យនឹងបញ្ចូលបំពង់វែងស្តើង ដែលហៅថា Catheter ចូលទៅក្នុងសរសៃឈាមនៅដៃឬជើង។ បន្ទាប់មក នឹងរុញវាទៅកាន់បេះដូងរបស់លោកអ្នកដោយមានជំនួយពីម៉ាស៊ីន X-ray ពិសេស។
- រួចហើយ ពួកគេនឹងចាក់ថ្នាំជ្រលក់តាមរយៈ Catheter ដើម្បីបង្កើតវីដេអូកាំរស្មី X របស់សន្ទះបេះដូង, សរសៃឈាមបេះដូង, និងថតបេះដូង។
- Electrophysiology study ៖ តេស្តនេះកត់ត្រាពីសកម្មភាពអគ្គិសនី និងផ្លូវបេះដូងរបស់លោកអ្នក។ វាអាចជួយស្វែងរកនូវអ្វីដែលបណ្តាលឱ្យមានបញ្ហាចង្វាក់បេះដូង និងស្វែងរកការព្យាបាលដ៏ល្អបំផុតសម្រាប់លោកអ្នក។ ក្នុងអំឡុងពេលធ្វើតេស្ត គ្រូពេទ្យនឹងធ្វើឱ្យបញ្ហាចង្វាក់បេះដូងមិនធម្មតារបស់លោកអ្នកមានសុវត្ថិភាព។ បន្ទាប់មក ពួកគេអាចនឹងឱ្យលោកអ្នកប្រើថ្នាំ ដើម្បីមើលថាតើថ្នាំមួយណាដែលល្អបំផុត ឬរកមើលនីតិវិធី ឬឧបករណ៍អ្វីដែលលោកអ្នកត្រូវការដើម្បីព្យាបាល។
- Head-up tilt table test ៖ គ្រូពេទ្យប្រើតេស្តនេះដើម្បីរកនូវអ្វីដែលបណ្តាលឱ្យលោកអ្នកដួលសន្លប់។ វាវាស់ភាពខុសគ្នានៃចង្វាក់បេះដូង និងសម្ពាធឈាមនៅពេលលោកអ្នកក្រោកឡើង និងគេងចុះ។ លោកអ្នកនឹងធ្វើតេស្តនេះនៅក្នុងមន្ទីរពិសោធន៍។ លោកអ្នកត្រូវគេងលើកំណាត់មួយ ដែលអាចធ្វើចលនាផ្អៀងចុះឡើងទៅជ្រុងផ្សេងៗ ដែលខណៈពេលនោះក៏មាន EKG និងអ្នកឯកទេសដើមី្បពិនិត្យសម្ពាធឈាម និងកម្រិតអុកស៊ីសែន។ តេស្តនេះនឹងបង្ហាញប្រសិនបើមានអាការសន្លប់ ដែលបណ្តាលមកពីប្រព័ន្ធអគ្គិសនី, ប្រព័ន្ធសរសៃប្រសាទ, ឬប្រព័ន្ធសរសៃឈាមរបស់លោកអ្នក។
ការព្យាបាល Arrhythmia
ការព្យាបាលនឹងអាស្រ័យលើប្រភេទ Arrhythmia ដែលលោកអ្នកមាន។ គ្រូពេទ្យរបស់លោកអ្នកអាចណែនាំនូវការព្យាបាលមួយ ឬច្រើន។
ថ្នាំ
ថ្នាំដែលព្យាបាល Arrhythmia រួមមាន ៖
- Adenosine (Adenocard)
- Atropine (Atropen)
- Beta-blockers
- Calcium channel blockers
- Digoxin (Digitek, Digox, Lanoxin)
- Potassium channel blockers
- Sodium channel blockers
Valsalva Maneuver
បច្ចេកទេសនេះនឹងធ្វើឱ្យរាងកាយរបស់លោកអ្នកសម្រាក ដោយវាមានឥទ្ធិពលដល់សរសៃប្រសាទ ដែលជួយគ្រប់គ្រងចង្វាក់បេះដូងរបស់លោកអ្នក។ គ្រូពេទ្យអាចប្រាប់លោកអ្នកឱ្យ ៖
- ក្អក ឬខ្ទប់ច្រមុះ
- ទប់ដង្ហើម ហើយឱនចុះ (Valsalva maneuver)
- គេងចុះ
- ដាក់កន្សែងត្រជាក់ សើមលើមុខរបស់លោកអ្នក
Electrical Cardioversion
ប្រសិនបើថ្នាំមិនអាចគ្រប់គ្រងចង្វាក់បេះដូងមិនស្មើគ្នា (ដូចជា Atrial Fibrillation ជាដើម) បាន នោះលោកអ្នកប្រហែលជាត្រូវការការព្យាបាលបេះដូង (Cardioversion)។ ចំពោះបញ្ហានេះ គ្រូពេទ្យនឹងធ្វើឱ្យលោកអ្នកគេង ហើយបន្ទាប់មកនឹងឆក់អគ្គិសនីជញ្ជាំងទ្រូងរបស់លោកអ្នក ដើម្បីរំញោចចង្វាក់បេះដូងឱ្យដើរទៀងទាត់។
Pacemaker
ឧបករណ៍នេះបញ្ជូនកម្លាំងអគ្គិសនីតូចៗទៅកាន់សាច់ដុំបេះដូងរបស់លោកអ្នកដើម្បីរក្សាចង្វាក់បេះដូង។ វារួមបញ្ចូលទាំងម៉ាស៊ីនបង្កើនជីពចរ ដែលផ្ទុកថ្ម និងកុំព្យូទ័រតូចមួយ និងខ្សែភ្លើង ដែលបញ្ជូនបន្ទុកទៅសាច់ដុំបេះដូង។
Implantable cardioverter defibrillator (ICD)
គ្រូពេទ្យភាគច្រើនប្រើ ICD ដើម្បីព្យាបាល Ventricular Tachycardia និង Ventricular Fibrillation ជាចង្វាក់បេះដូងពីរប្រភេទដែលគំរាមកំហែងដល់អាយុជីវិត។
ICD តាមដានចង្វាក់បេះដូងលោកអ្នកជាប់ជានិច្ច។ នៅពេលវារកឃើញចង្វាក់បេះដូងដែលមិនធម្មតា និងលឿន វានឹងឆក់អគ្គិសនីដល់សាច់ដុំបេះដូង ដើមី្បធ្វើឱ្យវាលោតមកចង្វាក់ធម្មតាម្តងទៀត។ វាអាចធ្វើតាមវិធីមួយ ក្នុងចំណោមវិធីខាងក្រោមនេះ ៖
- Anti-tachycardia pacing (ATP) ៖ ស៊េរីនៃចរន្តអគ្គិសនីតូចៗចំពោះសាច់ដុំបេះដូងដើមី្បស្តារល្បឿន និងចង្វាក់ធម្មតា។
- Cardioversion ៖ លោកអ្នកអាចនឹងទទួលបានការឆក់ក្នុងថាមពលទាប ក្នុងពេលតែមួយដែលបេះដូងលោត ដើម្បីស្តារចង្វាក់ឱ្យទៀងទាត់។
- Defibrillation ៖ នៅពេលដែលចង្វាក់បេះដូងលោតលឿន ឬមិនស្មើគ្នាដែលមានសភាពគ្រោះថ្នាក់ នោះសាច់ដុំបេះដូងរបស់លោកអ្នកត្រូវការឆក់ថាមពលកម្រិតខ្ពស់ដើម្បីស្តារចង្វាក់មកធម្មតាវិញ។
- Anti-bradycardia pacing ៖ ICD ជាច្រើនផ្តល់ការបម្រុង Pacing ទុក ដើម្បីរក្សាចង្វាក់បេះដូង ប្រសិនបើវាថយចុះច្រើន។
Catheter Ablation
នីតិវិធីនេះចាត់ថាជាការដាក់ខ្សែភ្លើងជាថ្មី (Rewire) ដើម្បីដោះស្រាយបញ្ហាអគ្គិសនីនៅក្នុងបេះដូងរបស់លោកអ្នក។
គ្រូពេទ្យនឹងបញ្ចូល Catheter តាមជើងរបស់លោកអ្នក។ វាផ្តល់ថាមពលអគ្គិសនីដែលមានប្រេកង់ខ្ពស់ ទៅតំបន់តូចមួយនៅខាងក្នុងបេះដូង ដែលជាមូលហេតុធ្វើឱ្យចង្វាក់បេះដូងលោកអ្នកមិនធម្មតា។ ថាមពលនេះនឹងផ្តាច់ផ្លូវនៃចង្វាក់មិនធម្មតានោះ។
វេជ្ជបណ្ឌិតប្រើ Ablation ដើម្បីព្យាបាលជំងឺ PSVTs, atrial flutter, atrial fibrillation, atrial and ventricular tachycardias មួយចំនួន។
ការវះកាត់បេះដូងសម្រាប់ Arrhythmia
Maze Procedure គឺជាប្រភេទការវះកាត់ដើម្បីកែខៃ Atrial Fibrillation ។ គ្រូពេទ្យនឹងធ្វើការជាស៊េរី ឬ Maze ដោយវះកាត់នៅក្នុងថតបេះដូងខាងលើរបស់លោកអ្នក។ គោលដៅគឺដើម្បីរក្សាចរន្តអគ្គិសនីរបស់បេះដូងលោកអ្នក ឱ្យនៅតែលើផ្លូវជាក់លាក់មួយប៉ុណ្ណោះ។ មនុស្សខ្លះ បន្ទាប់មក ក៏ត្រូវការ Pacemaker។
គ្រូពេទ្យអាចនឹងណែនាំនីតិវិធីផ្សេង ដូចជាការវះកាត់វាងជំងឺសរសៃឈាមបេះដូង (Coronary Bypass) ដើម្បីព្យាបាលទម្រង់ជំងឺបេះដូងដទៃទៀត។
ផលវិបាករបស់ Arrhythmia
បើគ្មានការព្យាបាលទេ នោះ Arrhythmia អាចបង្កបញ្ហាគ្រោះថ្នាក់ដូចជា ៖
- ជំងឺ Alzheimer និង Dementia ៖ ជំងឺ Cognitive ទាំងនេះអាចកើតឡើងដោយសារតែខួរក្បាលរបស់លោកអ្នកមិនមានឈាមគ្រប់គ្រាន់។
- ជំងឺខ្សោយបេះដូង ៖ បេះដូងរបស់លោកអ្នកប្រហែលជាមិនច្របាច់ឈាម ដូចដែលវាគួរតែច្របាច់នោះទេ បន្ទាប់ពីកើត Arrhythmia ម្តងទៀត។
- ជំងឺដាច់សរសៃឈាមខួរក្បាល ៖ ឈាមដែលជាប់ក្នុងថតបេះដូងខាងលើរបស់លោកអ្នកអាចកក។ ប្រសិនបើកំណកឈាមធ្វើដំណើរទៅកាន់ខួរក្បាល នោះវាអាចបណ្តាលឱ្យដាច់សរសៃឈាមខួរក្បាល។
- Cardiac arrest ៖ V-fib អាចបណ្តាលឱ្យបេះដូងលោកអ្នកឈប់ដើរ។
ការបង្ការ Arrhythmia
លោកអ្នកមិនអាចបង្ការ Arrhythmia បានរហូតទេ។ ការទៅពិនិត្យសុខភាពជាទៀងទាត់ អាចជួយលោកអ្នកមិនឱ្យមានបញ្ហាចង្វាក់បេះដូងច្រើន។ ប៉ុន្តែត្រូវប្រាកដថា លោកអ្នកបានប្រាប់គ្រូពេទ្យឱ្យដឹងពីថ្នាំដែលលោកអ្នកកំពុងប្រើ។ ថ្នាំផ្តាសាយ និងថ្នាំក្អកខ្លះអាចបង្កឱ្យមាន Arrhythmia ដូច្នេះសូមពិគ្រោះជាមួយគ្រូពេទ្យមុនពេលប្រើវា។
មួយទៀត គ្រូពេទ្យក៏អាចណែនាំឱ្យផ្លាស់ប្តូររបៀបរស់នៅមួយចំនួនផងដែរ ដូចជា៖
- ញ៉ាំរបបអាហារដែលផ្តល់សុខភាពល្អ។ ញ៉ាំផ្លែឈើ និងបន្លែ, ត្រី, និងប្រូតេអ៊ីនដែលបានមកពីរុក្ខជាតិឱ្យបានច្រើន។ ជៀសវាងខ្លាញ់ឆ្អែត និងខ្លាញ់បំលែង។
- គ្រប់គ្រងកូឡេស្តេរ៉ូល និងសម្ពាធឈាម។
- កុំជក់បារី។
- រក្សាទម្ងន់ដែលមានល្អចំពោះសុខភាព។
- ហាត់ប្រាណឱ្យបានទៀងទាត់។
- គ្រប់គ្រងស្ត្រេស។
- កម្រិតការផឹកជាតិស្រវឹង និងកាហ្វេអ៊ីន។
