Common
គោលការណ៍ណែនាំពីការប្រើថ្នាំលើសឈាម
គ្រូពេទ្យអាចចេញវេជ្ជបញ្ជាថ្នាំដែលលោកអ្នកអាចប្រើដើម្បីបន្ថយសម្ពាធឈាមខ្ពស់។ ប្រសិនបើមានផលវិបាកទាក់ទងនឹងជំងឺលើសឈាម នោះគាត់អាចនឹងចេញវេជ្ជបញ្ជាថ្នាំផ្សេងទៀត។ មិនថាការព្យាបាលបានចេញវេជ្ជបញ្ជាអ្វីក៏ដោយ វាជាចំណុចល្អក្នុងការចងចាំគោលការណ៍ណែនាំដូចខាងក្រោមនេះ នៅពេលអ្នកប្រើថ្នាំតាមវេជ្ជបញ្ជានោះ។
- គ្រូពេទ្យអាចចេញវេជ្ជបញ្ជាថ្នាំដែលលោកអ្នកអាចប្រើដើម្បីបន្ថយសម្ពាធឈាមខ្ពស់។ ប្រសិនបើមានផលវិបាកទាក់ទងនឹងជំងឺលើសឈាម នោះគាត់អាចនឹងចេញវេជ្ជបញ្ជាថ្នាំផ្សេងទៀត។ មិនថាការព្យាបាលបានចេញវេជ្ជបញ្ជាអ្វីក៏ដោយ វាជាចំណុចល្អក្នុងការចងចាំគោលការណ៍ណែនាំដូចខាងក្រោមនេះ នៅពេលអ្នកប្រើថ្នាំតាមវេជ្ជបញ្ជានោះ។
- សូមប្រាប់ឈ្មោះថ្នាំដែលលោកអ្នកប្រើ និងឈ្មោះថ្នាំឬចំនួនថ្នាំដែលផ្លាស់ប្តូរ ទៅគ្រូពេទ្យទាំងអស់ដែលលោកអ្នកទៅជួប។
- លេបថ្នាំតាមកាលវិភាគ នៅម៉ោងដដែល ជារៀងរាល់ថ្ងៃ។ កុំបញ្ឈប់ការលេបថ្នាំឬផ្លាស់ប្តូរថ្នាំ លើកលែងតែលោកអ្នកបានពិគ្រោះជាមួយគ្រូពេទ្យហើយ។ ទោះបីជាលោកអ្នកមានអារម្មណ៍ល្អក៏ដោយ សូមបន្តប្រើថ្នាំ។ ការបញ្ឈប់ការញ៉ាំថ្នាំភ្លាមៗអាចធ្វើឱ្យស្ថានភាពជំងឺកាន់តែធ្ងន់ធ្ងរ។
- សូមមានរបៀបក្នុងការប្រើថ្នាំ។ ឧទាហរណ៍ ប្រើប្រអប់ដាក់សញ្ញាសម្គាល់ថ្ងៃលេបក្នុងសប្តាហ៍ និងសូមបំពេញថ្នាំទៅក្នុងប្រអប់នៅដើមសប្តាហ៍នីមួយៗដើម្បីងាយស្រួលចងចាំ។
- រក្សាប្រក្រតិទិនថ្នាំ និងកត់ចំណាំរាល់ពេលដែលលោកអ្នកលេបថ្នាំ។ លើវេជ្ជបញ្ជានឹងប្រាប់លោកអ្នកថាត្រូវលេបប៉ុន្មានគ្រាប់ក្នុងមួយដូស (dose) ប៉ុន្តែគ្រូពេទ្យអាចផ្លាស់ប្តូរកម្រិតថ្នាំ អាស្រ័យការឆ្លើយតបរបស់ខ្លួនលោកអ្នកចំពោះថ្នាំ។ នៅលើប្រក្រតិទិនថ្នាំ លោកអ្នកអាចធ្វើបញ្ជីរៀបរាប់ពីការផ្លាស់ប្តូរកម្រិតថ្នាំដែលចេញវេជ្ជបញ្ជាដោយគ្រូពេទ្យ។
- កុំបន្ថយចំនួនថ្នាំដើម្បីសន្សំប្រាក់។ លោកអ្នកត្រូវតែយកលេបឱ្យគ្រប់ចំនួនដើម្បីទទួលបានអត្ថប្រយោជន៍ពេញលេញពីថ្នាំ។ ប្រសិនបើតម្លៃជាបញ្ហានោះ សូមពិគ្រោះជាមួយគ្រូពេទ្យដើមី្បរកវិធីណាដែលជួយឱ្យលោកអ្នកអាចកាត់បន្ថយថ្លៃថ្នាំបាន។
- កុំប្រើថ្នាំដែលគ្មានវេជ្ជបញ្ជា ឬព្យាបាលរោគដោយឱសថបុរាណ លើកលែងតែលោកអ្នកសួរគ្រូពេទ្យជាមុនសិន។ ថ្នាំខ្លះអាចមានអន្តរកម្មជាមួយគ្នា បង្កឱ្យមានផលប៉ះពាល់ដែលលោកអ្នកមិនចង់បាន។
- ប្រសិនបើលោកអ្នកភ្លេចលេបថ្នាំ សូមលេបថ្នាំភ្លាមៗនៅពេលដែលលោកអ្នកនឹកឃើញ។ ប៉ុន្តែប្រសិនបើជិតដល់ពេលលេបថ្នាំបន្ទាប់ អ៊ីចឹងសូមលោកអ្នករំលងថ្នាំមួយពេលដែលខកខាននោះ ហើយលេបថ្នាំបន្តដូចធម្មតា។ សូមកុំលេបថ្នាំពីរពេលនោះបញ្ចូលគ្នា ដើម្បីបំពេញពេលដែលខកឱ្យសោះ។
- បំពេញថ្នាំតាមវេជ្ជបញ្ជាឱ្យបានទៀងទាត់ ហើយសួរឱសថការីប្រសិនបើលោកអ្នកមានសំណួរអ្វី។ កុំរង់ចាំដល់អស់ថ្នាំរលីង ទើបទៅទិញ។ ប្រសិនបើអ្នកមានបញ្ហាក្នុងការទៅឱសថស្ថាន មានក្តីបារម្ភផ្នែកហិរញ្ញវត្ថុ ឬមានបញ្ហាផ្សេងទៀតដែលធ្វើឱ្យលោកអ្នកពិបាកក្នុងការបានថ្នាំ សូមប្រាប់គ្រូពេទ្យរបស់លោកអ្នក។
- ពេលធ្វើដំណើរ សូមរក្សាទុកថ្នាំជាប់ជាមួយខ្លួន ដូច្នេះលោកអ្នកអាចប្រើវាតាមកាលវិភាគបាន។ ចំពោះការធ្វើដំណើរឆ្ងាយ សូមរៀបចំចំនួនថ្នាំសម្រាប់លេបមួយសប្តាហ៍ដាក់តាមខ្លួនឱ្យហើយ និងចម្លងវេជ្ជបញ្ជាទុកមើល ក្រែងលោនៅតាមផ្លូវ អស់ថ្នាំ ហើយលោកអ្នកត្រូវការទិញបន្ថែម។
- មុនពេលប្រើថ្នាំសន្លប់ (general anesthetic) ដើមី្បធ្វើការវះកាត់ រួមទាំងការវះកាត់ធ្មេញ សូមលោកអ្នកប្រាប់គ្រូពេទ្យឬពេទ្យធ្មេញទទួលបន្ទុកវះកាត់ថាពីថ្នាំដែលលោកអ្នកកំពុងប្រើ។ ជាមួយគ្នានេះផងដែរ សូមប្រាប់គ្រូពេទ្យ បើសិនបើលោកអ្នកកំពុងប្រើថ្នាំអាស្ពីរីន និងឬ ថ្នាំធ្វើឱ្យឈាមរាវផ្សេងៗ។
- ថ្នាំមួយចំនួនអាចផ្លាស់ប្តូរចង្វាក់បេះដូងរបស់លោកអ្នក ដូច្នេះសូមពិនិត្យជីពចរខ្លួនលោកអ្នកជាប្រចាំ។
- ថ្នាំដែលបន្ធូរភាពតឹងនៃសរសៃឈាមអាចបណ្តាលឱ្យវិលមុខ។ ប្រសិនបើអ្នកមានអារម្មណ៍វិលមុខនៅពេលឈរឬក្រោកពីគ្រែ សូមអង្គុយចុះឬគេងពីរបីនាទីសិន។ នេះមានន័យថាសម្ពាធឈាមរបស់លោកអ្នកកើន។ បន្ទាប់មក សឹមក្រោកឡើងយឺតៗ។
Translate by Chakriya Phou
