ការយល់ដឹងពីការមានផ្ទៃពោះនៅត្រីមាសទី ១
ត្រីមាសទី ១ គឺជាដំណាក់កាលដំបូងនៃការមានផ្ទៃពោះ។ វាចាប់ផ្តើមនៅថ្ងៃដំបូងនៃការមករដូវចុងក្រោយរបស់អ្នក (មុនពេលអ្នកមានផ្ទៃពោះ) និងមានរយៈពេលរហូតដល់ចុងសប្តាហ៍ទី ១៣ ។ វាជាពេលវេលានៃការរង់ចាំយ៉ាងរំភើប និងការផ្លាស់ប្តូរយ៉ាងឆាប់រហ័សសម្រាប់អ្នក និងកូនរបស់អ្នក។ ការដឹងពីអ្វីដែលត្រូវរំពឹងនឹងជួយអ្នកឱ្យត្រៀមខ្លួនសម្រាប់ខែបន្ទាប់។
ការផ្លាស់ប្តូរនៅត្រីមាសទី ១ នៅក្នុងខ្លួនរបស់អ្នក
ការមានផ្ទៃពោះគឺខុសគ្នាចំពោះស្ត្រីគ្រប់រូប។ ស្ត្រីខ្លះមានសុខភាពល្អអំឡុងពេល ៣ ខែដំបូង។ អ្នកផ្សេងទៀតមានអារម្មណ៍ថាពិតជាវេទនាខ្លាំងណាស់។ ខាងក្រោមនេះគឺជាការផ្លាស់ប្តូរមួយចំនួន ដែលអ្នកអាចកត់សម្គាល់អត្ថន័យរបស់ពួកវា ហើយនិងសញ្ញាណាមួយដែលតម្រូវឱ្យមានការទាក់ទងទៅវេជ្ជបណ្ឌិត។
ការធ្លាក់ឈាម៖ ប្រហែលជា ២៥% នៃស្ត្រីមានផ្ទៃពោះមានការធ្លាក់ឈាមតិចតួចក្នុងអំឡុងពេលត្រីមាសទី ១ ។ នៅដំណាក់កាលដំបូងនៃការមានផ្ទៃពោះ ការធ្លាក់ឈាមតិចតួចអាចជាសញ្ញាមួយ ដែលអំប្រ៊ីយ៉ុងបង្កកំណើតបានរំកិលក្នុងស្បូនរបស់អ្នក។ ប៉ុន្តែប្រសិនបើអ្នកមានការធ្លាក់ឈាមច្រើន រមួលសាច់ដុំជុំវិញស្បូន ឬឈឺចាប់ខ្លាំងនៅក្នុងពោះ សូមទាក់ទងទៅវេជ្ជបណ្ឌិត។ ទាំងនេះអាចជាសញ្ញានៃការរលូតកូន ឬការមានកូនក្រៅស្បូន។
ការឈឺសុដន់៖ សុដន់ឈឺគឺជាសញ្ញាមួយក្នុងចំណោមសញ្ញាដំបូងបំផុតនៃការមានផ្ទៃពោះ។ វាបណ្តាលមកពីការផ្លាស់ប្តូរអ័រម៉ូន ដែលធ្វើឱ្យរន្ធទឹកដោះរបស់អ្នកត្រៀមខ្លួនដើម្បីបំបៅកូនរបស់អ្នក។ សុដន់របស់អ្នកប្រហែលជាឈឺពេញមួយត្រីមាសដំបូង។ ការឡើងទំហំអាវទ្រនាប់ និងពាក់អាវទ្រនាប់ទ្រទ្រង់អាចធ្វើឱ្យអ្នកមានអារម្មណ៍ស្រួលជាងមុន។ អ្នកប្រហែលជាមិនអាចត្រលប់ទៅពាក់អាវទ្រនាប់ទំហំធម្មតាបានទេ រហូតទាល់តែកូនរបស់អ្នកលែងបៅ។
ការទល់លាមក៖ ក្នុងអំឡុងពេលមានផ្ទៃពោះ កម្រិតខ្ពស់នៃអ័រម៉ូនប្រូសេស្តេរ៉ូនធ្វើឱ្យការកន្ត្រាក់សាច់ដុំថយចុះ ដែលជាធម្មតារំកិលអាហារឆ្លងកាត់ប្រព័ន្ធរបស់អ្នក។ បន្ថែមពីលើនេះ ជាតិដែកបន្ថែម ដែលអ្នកទទួលបានពីវីតាមីនចម្រុះសម្រាប់ស្រ្តីមានផ្ទៃពោះ។ ជាលទ្ធផលអ្នកទល់លាមក និងឡើងហ្គាស ដែលអាចធ្វើឱ្យអ្នកហើមពោះពេញមួយអំឡុងពេលមានផ្ទៃពោះ។ សូមទទួលទានអាហារជាតិសរសៃ និងផឹកទឹកឱ្យបានច្រើន ដើម្បីជួយជំរុញដំណើរការរំកិលអាហារទៅបានរលូន។ សកម្មភាពរាងកាយក៏អាចជួយបានដែរ។
ប្រសិនបើការទល់លាមកពិតជារំខានដល់អ្នក សូមពិគ្រោះជាមួយគ្រូពេទ្យអំពីថ្នាំបន្ទន់លាមកដែលមានកម្រិតស្រាល និងមានសុវត្ថិភាពក្នុងការប្រើអំឡុងពេលមានផ្ទៃពោះ។
ការធ្លាក់ទឹករំអិល៖ វាជារឿងធម្មតាទេដែលឃើញមានការធ្លាក់ទឹករំអិលពណ៌សទឹកដោះគោថ្លា ( ហៅថាការធ្លាក់ស ) នៅពេលមានផ្ទៃពោះដំបូង។ អ្នកអាចប្រើសំឡីអនាម័យ ប្រសិនបើវាធ្វើឱ្យអ្នកមានអារម្មណ៍ស្រួលជាងមុន ប៉ុន្តែសូមកុំប្រើដុំសំឡីអនាម័យដាក់ក្នុងទ្វារមាស (tampon) ពីព្រោះវាអាចធ្វើឱ្យមេរោគចូលក្នុងទ្វារមាសរបស់អ្នក។ ប្រសិនបើការធ្លាក់ទឹករំអិលមានក្លិនមិនល្អ ប្រសិនបើវាមានពណ៌បៃតង ឬពណ៌លឿង ឬប្រសិនបើមានការធ្លាក់ទឹករំអិលថ្លា សូមទាក់ទងទៅវេជ្ជបណ្ឌិត។
ភាពល្ហិតល្ហៃ៖ រាងកាយរបស់អ្នកធ្វើការយ៉ាងខ្លាំង ដើម្បីទ្រទ្រង់ទារកដែលកំពុងលូតលាស់។ នោះមានន័យថាអ្នកនឹងងាយអស់កម្លាំងជាងធម្មតា។ សូមគេងថ្ងៃ ឬសម្រាកនៅពេលអ្នកអស់កម្លាំងនៅពេលថ្ងៃ។ ត្រូវប្រាកដថាអ្នកទទួលបានជាតិដែកគ្រប់គ្រាន់។ ជាតិដែកតិចតួចពេកអាចនាំឱ្យមានភាពស្លេកស្លាំង ដែលអាចធ្វើឱ្យអ្នកកាន់តែអស់កម្លាំង។
អាហារដែលចូលចិត្ត និងមិនចូលចិត្ត៖ ទោះបីជាអ្នកប្រហែលជាមិនចង់ញុំាការេម ដែលលាយជាមួយបន្ទះ chip ជីរអង្កាម ដែលដាក់ជ្រក់ត្រសក់រសជាតិ dill នៅពីលើក៏ដោយ ក៏ចំណង់អាហាររបស់អ្នកអាចផ្លាស់ប្តូរនៅពេលអ្នកមានផ្ទៃពោះ។ ស្ត្រីមានផ្ទៃពោះជាង ៦០ ភាគរយមានចំណង់អាហារ។ ស្ត្រីច្រើនជាងពាក់កណ្តាលទទួលទានអាហារ ដែលពួកគេមិនចូលចិត្ត។ ការមានចំណង់អាហារម្តងម្កាលគឺមិនអីទេ ដរាបណាអ្នកទទួលទានអាហារដែលល្អចំពោះសុខភាព និងមានកាឡូរីទាបច្រើន។ លើកលែងការចង់ញុំារបស់ដែលមិនមែនអាហារដូចជា៖ ដីឥដ្ឋ ធូលី និងម្សៅសាប៊ូបោកសម្លៀកបំពាក់ ដែលអាចបង្កគ្រោះថ្នាក់ដល់អ្នក និងកូន។ ប្រសិនបើអ្នកមានអាការបែបនេះ សូមរាយការណ៍ទៅគ្រូពេទ្យភ្លាម។
នោមញឹក៖ កូនរបស់អ្នកនៅតូចនៅឡើយ ប៉ុន្តែស្បូនរបស់អ្នករីកធំ ហើយវាដាក់សម្ពាធលើប្លោកនោមរបស់អ្នក។ ជាលទ្ធផលអ្នកអាចមានអារម្មណ៍ថាអ្នកត្រូវទៅបន្ទប់ទឹកគ្រប់ពេល។ សូមកុំបញ្ឈប់ការទទួលទានសារធាតុរាវ រាងកាយរបស់អ្នកត្រូវការសារធាតុរាវ ប៉ុន្តែត្រូវកាត់បន្ថយជាតិកាហ្វេអ៊ីន ( ដែលរំញោចប្លោកនោម ) ជាពិសេសមុនពេលចូលគេង។ ពេលមានអារម្មណ៍ចង់បត់ជើងតូច ត្រូវទៅបន្ទប់ទឹកភ្លាម។ សូមកុំទប់វា។
ចុកចុងដង្ហើម៖ ក្នុងអំឡុងពេលមានផ្ទៃពោះ រាងកាយរបស់អ្នកផលិតអ័រម៉ូនប្រូសេស្តេរ៉ូនច្រើន។ វាជួយបន្ធូរសាច់ដុំ ដូចជាកងសាច់ដុំនៅក្នុងបំពង់អាហារខាងក្រោម ដែលជាបំពង់ដែលភ្ជាប់មាត់ និងក្រពះរបស់អ្នក។ ជាធម្មតាសាច់ដុំទាំងនេះទប់អាហារ និងអាស៊ីតក្នុងក្រពះរបស់អ្នក។ នៅពេលដែលពួកវារលុង អ្នកអាចមានអាការចាល់អាស៊ីតដែលត្រូវបានគេស្គាល់ថាជាការចុកចុងដង្ហើម។ ដើម្បីជៀសវាងការចុកចុងដង្ហើម៖
- សូមបរិភោគអាហារតិចតួចពីរបីដងក្នុងមួយថ្ងៃ។
- កុំគេងក្រោយពេលបរិភោគ។
- សូមជៀសវាងអាហារដែលមានជាតិខ្លាញ់ច្រើន ហឹរ និងមានជាតិអាស៊ីដ ( ដូចជាផ្លែឈើអំបូរក្រូច ) ។
- សូមព្យាយាមលើកខ្នើយកើយរបស់អ្នកឱ្យខ្ពស់ពេលអ្នកគេង។
ប្រែប្រួលអារម្មណ៍៖ ការកើនឡើងនៃភាពល្ហិតល្ហៃ និងការផ្លាស់ប្តូរអ័រម៉ូនអាចធ្វើឱ្យអ្នកប្រែប្រួលអារម្មណ៍ ដែលប្តូរអារម្មណ៍អ្នកពីរីករាយទៅសោកសៅ ឬពីមានសង្ឃឹមទៅភ័យរន្ធត់ក្នុងរយៈពេលតែប៉ុន្មានវិនាទី។ វាមិនអីទេក្នុងការយំ ប៉ុន្តែប្រសិនបើអ្នកមានអារម្មណ៍ធុញថប់ សូមព្យាយាមរកអ្នកដែលអាចស្តាប់អ្នករៀបរាប់ទុកសោក។ អ្នកអាចនិយាយជាមួយដៃគូរបស់អ្នក មិត្តភក្តិ សមាជិកគ្រួសារ ឬអ្នកជំនាញ។
ចាញ់កូន៖ ការចង់ក្អួតគឺជាអាការមួយក្នុងចំណោមអាការទូទៅបំផុតនៃការមានផ្ទៃពោះ។ រហូតដល់ ៨៥% នៃស្ត្រីមានផ្ទៃពោះចាញ់កូន។ វាបណ្តាលមកពីការផ្លាស់ប្តូរអ័រម៉ូននៅក្នុងខ្លួនរបស់អ្នក ហើយវាអាចមានរយៈពេលពេញមួយត្រីមាសដំបូង។ ចំពោះស្ត្រីមានផ្ទៃពោះមួយចំនួន ការចង់ក្អួតមានកម្រិតស្រាល។ ស្ត្រីមួយចំនួនទៀតមិនអាចចាប់ផ្តើមថ្ងៃថ្មីដោយគ្មានការក្អួតទេ។ ការចង់ក្អួតជាធម្មតាធ្ងន់ធ្ងរនៅពេល។ ដើម្បីបន្ថយការចង់ក្អួត សូមព្យាយាមទទួលទានអាហារសម្រន់តិចតួច ដែលមានរសជាតិស្រាល ឬមានជាតិប្រូតេអ៊ីនខ្ពស់ ( នំស្រួយ សាច់ ឬឈីស ) និងញុំាទឹក ទឹកផ្លែឈើថ្លា ( ទឹកផ្លែប៉ោម ) ឬទឹកខ្ញី។ អ្នកប្រហែលជាចង់ទទួលទានបែបនេះមុនពេលអ្នកក្រោកពីគ្រែ។ សូមជៀសវាងអាហារណាដែលធ្វើអោយអ្នកឈឺពោះ។ ការចង់ក្អួតមិនមែនជាអ្វីដែលត្រូវព្រួយបារម្ភនោះទេ។ ប៉ុន្តែប្រសិនបើវាធ្ងន់ធ្ងរ ឬមិនបាត់ វាអាចប៉ះពាល់ដល់បរិមាណអាហារូបត្ថម្ភដែលទារកទទួលបាន។ សូមទាក់ទងទៅគ្រូពេទ្យ ប្រសិនបើអ្នកមិនអាចបញ្ឈប់ការក្អួតបាន។
ឡើងទម្ងន់៖ ការមានផ្ទៃពោះគឺជាពេលមួយ ក្នុងចំណោមពេលពីរបីក្នុងជីវិតរបស់ស្ត្រី នៅពេលដែលការឡើងទម្ងន់ត្រូវបានគេចាត់ទុកថាជារឿងល្អ ប៉ុន្តែសូមកុំបណ្តោយឱ្យឡើងទម្ងន់ហួស។ ក្នុងត្រីមាសទី ១ អ្នកគួរតែឡើងទម្ងន់ពី ៣-៦ ផោន ( គ្រូពេទ្យអាចណែនាំឱ្យអ្នកដំឡើង ឬបញ្ចុះទម្ងន់ ប្រសិនបើអ្នកចាប់ផ្តើមមានផ្ទៃពោះដោយមិនគ្រប់ទម្ងន់ ឬលើសទម្ងន់ ) ។ ទោះបីជាអ្នកកំពុងពពោះក៏ដោយ អ្នកមិនទទួលទានសម្រាប់មនុស្សពីរនាក់ទេ។ ក្នុងត្រីមាសទី ១ អ្នកត្រូវការកាឡូរីបន្ថែមត្រឹមតែ ១៥០ ក្នុងមួយថ្ងៃ ប៉ុណ្ណោះ។ សូមទទួលទានកាឡូរីទាំងនោះតាមវិធីដែលល្អចំពោះសុខភាព ដោយបន្ថែមផ្លែឈើ និងបន្លែ ទឹកដោះគោ នំប៉័ងដែលធ្វើពីគ្រាប់ធញ្ញជាតិ និងសាច់គ្មានខ្លាញ់ទៅក្នុងរបបអាហាររបស់អ្នក។
ការលូតលាស់របស់ទារកក្នុងត្រីមាសទី ១
ក្នុងអំឡុងពេល ១៣ សប្តាហ៍ដំបូង កូនរបស់អ្នកផ្លាស់ប្តូរពីស៊ុតបង្កកំណើតទៅជាទារកដែលមានទ្រង់ទ្រាយពេញលេញ។ សរីរាង្គ និងប្រព័ន្ធសំខាន់ៗទាំងអស់លេចចេញជារូបរាង។ នោះមានន័យថាកូនរបស់អ្នកអាចមានគ្រោះថ្នាក់ ប្រសិនបើអ្នកប្រើប្រាស់គ្រឿងញៀន មានជំងឺ ឬបានប៉ះពាល់នឹងវិទ្យុសកម្ម។ ខាងក្រោមគឺជាអ្វីដែលកំពុងកើតឡើង៖
- ស៊ុតបង្កកំណើតក្លាយជាចង្កោមនៃកោសិកាដែលបែងចែកយ៉ាងឆាប់រហ័ស ដែលបង្កប់ក្នុងស្បូនរបស់អ្នក។ សុក ទងផ្ចិត និងថង់ទឹកភ្លោះចាប់ផ្តើមលូតលាស់។
- ប្រព័ន្ធសរសៃប្រសាទរបស់ទារកផ្លាស់ប្តូរពីបំពង់សរសៃប្រសាទចំហរទៅជាខួរក្បាល និងខួរឆ្អឹងខ្នង។ សរសៃប្រសាទ និងសាច់ដុំចាប់ផ្តើមធ្វើការជាមួយគ្នា។ កូនរបស់អ្នកអាចធ្វើចលនាដោយខ្លួនឯង ប៉ុន្តែអ្នកមិនទាន់មានអារម្មណ៍ដឹងទេ។
- បេះដូងលេចចេញជារូបរាង ហើយចាប់ផ្តើមលោត។ អ្នកអាចឮសំឡេងបេះដូងលោតដោយឆ្លុះអេកូនៅដើមសប្តាហ៍ទី ៦។ កោសិកាឈាមក្រហមចាប់ផ្តើមបង្កើត។
- កូនរបស់អ្នកវិវឌ្ឍប្រព័ន្ធរំលាយអាហាររួមមាន៖ ពោះវៀន និងតម្រងនោម។
- កូនរបស់អ្នកចាប់ផ្តើមមើលទៅដូចជាទារក មានដៃ ជើង ម្រាមដៃ និងម្រាមជើង។ មុខរបស់ពួកគេមានភ្នែក ត្រចៀក ច្រមុះ មាត់ អណ្តាត និងពន្លកធ្មេញ។ ត្របកភ្នែកគ្របភ្នែកកូនអ្នក ហើយនៅចុងត្រីមាសកូនអ្នកថែមទាំងមានក្រចកដៃទៀតផង ។
- ប្រដាប់ភេទចាប់ផ្តើមលូតលាស់ ប៉ុន្តែវាលឿនពេកក្នុងការដឹងថាអ្នកមានកូនស្រី ឬកូនប្រុសដោយការឆ្លុះអេកូ។
នៅចុងបញ្ចប់នៃត្រីមាសទី ១ កូនរបស់អ្នកនឹងមានប្រវែងប្រហែល 2 ½-3 អ៊ីញ។
ការងារត្រូវធ្វើក្នុងត្រីមាសទីមួយ
ការមានកូនគឺជាពេលវេលារីករាយបំផុតមួយនៅក្នុងជីវិតរបស់ស្ត្រីជាច្រើន។ ពីការគិតអំពីថ្ងៃដែលអ្នកនឹងនាំកូនតូចអ្នកទៅផ្ទះ ការជ្រើសរើសឈ្មោះ និងពណ៌តុបតែងបន្ទប់ទារក វាគួរឱ្យរំភើបណាស់។ ប៉ុន្តែអ្នកក៏ត្រូវចាត់វិធានការណ៍ជាក់ស្តែងមួយចំនួនក្នុងអំឡុងត្រីមាសដំបូងដែរ៖
- ជ្រើសរើសគ្រូពេទ្យ។ តើអ្នកចង់បានគ្រូពេទ្យជំនាញផ្នែកសម្ភព ឬឆ្មបឬទេ? សូមទទួលការណែនាំប្រឹក្សា និងស្វែងយល់ពីអ្វីដែលធានារ៉ាប់រងសុខភាពរបស់អ្នកធានា។
- សូមកំណត់ពេលណាត់ជួបគ្រូពេទ្យភ្លាម ពេលអ្នកដឹងថាអ្នកមានផ្ទៃពោះ។ អ្នកនឹងត្រូវពិភាក្សាពីប្រធានបទជាច្រើន នៅក្នុងការណាត់ជួបលើកដំបូង។ វេជ្ជបណ្ឌិតនឹងកត់ត្រាប្រវត្តិវេជ្ជសាស្ត្រ និងសួរពីរបៀបរស់នៅ និងទម្លាប់សុខភាពរបស់អ្នក។ គ្រូពេទ្យនឹងគណនាថ្ងៃសម្រាលរបស់អ្នក។ អ្នកក៏ត្រូវធ្វើតេស្តឈាមនិងទឹកនោម និងអាចពិនិត្យអាងត្រគាកផងដែរ។
- សូមបន្តជួបជាមួយគ្រូពេទ្យរៀងរាល់ ៤ សប្តាហ៍ម្តង។ គ្រូពេទ្យនឹងពិនិត្យទម្ងន់ និងសម្ពាធឈាមរបស់អ្នក ធ្វើតេស្តទឹកនោម និងស្តាប់ចង្វាក់បេះដូងរបស់កូនអ្នក។
- សូមសិក្សាពីការធ្វើតេស្ត និងការថតឆ្លុះផ្សេងទៀតដែលអ្នកអាចត្រូវការដូចជា ការធ្វើតេស្តដើម្បីរកមើលបញ្ហាហ្សែនរបស់កូនអ្នក។
- សូមចាប់ផ្តើមលេបវីតាមីនចម្រុះសម្រាប់ស្រ្តីមានផ្ទៃពោះ ជាមួយអាស៊ីតហ្វូលិកយ៉ាងហោចណាស់ ៤០០ មីក្រូក្រាម ដើម្បីជួយខួរក្បាល និងខួរឆ្អឹងខ្នងរបស់កូនអ្នកឱ្យលូតលាស់បានត្រឹមត្រូវ។
- សូមសួរគ្រូពេទ្យពីថ្នាំមានវេជ្ជបញ្ជា និងគ្មានវេជ្ជបញ្ជាដែលអ្នកអាចលេបបានដោយសុវត្ថិភាព។
- សូមពិនិត្យមើលរបបអាហាររបស់អ្នក និងធ្វើការផ្លាស់ប្តូរដែលអ្នកត្រូវការ ដើម្បីធ្វើឱ្យប្រាកដថាអ្នក និងកូនទទួលបានអាហារូបត្ថម្ភត្រឹមត្រូវ។ សូមទទួលទានទឹកឱ្យបានច្រើន។
- សូមផ្តាច់ទម្លាប់អាក្រក់ដូចជា៖ ការជក់បារី និងការប្រើប្រាស់គ្រឿងញៀនខុសច្បាប់។ កាត់គ្រឿងស្រវឹង និងជាតិកាហ្វេអ៊ីន។
- សូមរក្សាទម្លាប់ហាត់ប្រាណរបស់អ្នក ប៉ុន្តែសូមស្តាប់រាងកាយរបស់អ្នក។ អ្នកប្រហែលជាត្រូវផ្លាស់ប្តូរប្រភេទលំហាត់ប្រាណ ឬធ្វើលំហាត់ប្រាណណាដែលស្រួលជាងមុន។
- សូមធ្វើការស្រាវជ្រាវពីចំណាយក្នុងការមានកូនម្នាក់ ហើយចាប់ផ្តើមធ្វើការផ្លាស់ប្តូរ។ តើអ្នកនឹងត្រូវចំណាយសម្រាប់ការថែទាំកុមារទេ? តើអ្នកនឹងត្រូវកាត់បន្ថយការងារទេ? សូមរៀបចំផែនការថវិកាថ្មីសម្រាប់តម្រូវការថ្មី។
- សូមជ្រើសរើសពេលវេលា និងវិធីដើម្បីចែករំលែកព័ត៌មានមានផ្ទៃពោះរបស់អ្នក។ អ្នកប្រហែលជាចង់រង់ចាំរហូតដល់អ្នកបានឮចង្វាក់បេះដូងរបស់ទារក ឬចាំឱ្យឆ្លងផុតត្រីមាសទី ១ ដោយសុវត្ថិភាព។ វាជាការឆ្លាតផងដែរក្នុងការស្វែងយល់ពីគោលការណ៍របស់ក្រុមហ៊ុនអំពីការឈប់សម្រាកលំហែមាតុភាព និងសិក្សាពីសិទ្ធិរបស់អ្នក មុនពេលអ្នកប្រាប់ដំណឹងទៅចៅហ្វាយអ្នក។
អាការបន្ទាន់ក្នុងអំឡុងពេលត្រីមាសទី ១
អាការណាមួយក្នុងចំណោមអាការខាងក្រោម អាចជាសញ្ញាបង្ហាញថាមានអ្វីមួយខុសប្រក្រតីជាមួយនឹងការមានផ្ទៃពោះរបស់អ្នកហើយ។ សូមកុំរង់ចាំរហូតដល់ថ្ងៃណាត់ជួបគ្រូពេទ្យពិនិត្យផ្ទៃពោះ ទើបប្រាប់គ្រូពេទ្យ។ សូមទាក់ទងទៅគ្រូពេទ្យភ្លាម ប្រសិនបើអ្នកមានអាការ៖
- ឈឺពោះធ្ងន់ធ្ងរ
- ធ្លាក់ឈាមច្រើន
- វិលមុខខ្លាំង
- ឡើងទម្ងន់លឿន ឬឡើងទម្ងន់តិចពេក
